Luk 13 | GAM | STEP | Jisas kandja dje moi al ge una pende aike molo embe dji, distrik Galili una kog sipsip opa gale ye awo moi kune ge, iwa Pailat dje worika yene ami una wo una to golmaka, sipsip ne, una meyamne soka aike er wo makimb al taimane po moi we dji.

Luke 13

Una nomane ake natoi dal, God ye tonda

1 Jisas kandja dje moi al ge una pende aike molo embe dji, distrik Galili una kog sipsip opa gale ye awo moi kune ge, iwa Pailat dje worika yene ami una wo una to golmaka, sipsip ne, una meyamne soka aike er wo makimb al taimane po moi we dji. 2 Djimaka Jisas embe dji, Galili una pende nomane ke napai ba ga to goi una nomane ketawa pai pille to goi mo? 3 Ge man. Galili una nomane ke porapora pa kune yendo. Ba ye nomane ke paro ge ake natoi dal, kambono goi mal ge, ye porapora goye. 4 Dumo Jerusalem paknato Sailom we dji yei al ge, numb kerman take pla pi ge gur dje yage una wan ten eit (18) to goi. Ba Jerusalem una pende nomane ke napai alla ga goi una nomane ketawa pai pille goi mo? 5 Ge man. Jerusalem una nomane ke porapora pa kune yendo. Alla ye nomane ke paro ge ake natoi dal, kambono goi mal ge, ye porapora goye we dji.

Iko ta moi megye natoi mal Jisas kandja buko dji

6 Jisas kandja buko ta dje awo embe dji, iwa ta mauye al iko pik ta moi. Une megye uro nano dje kani ba megye natoi. 7 Natoika, yene boiye iwa ta moi al embe dji, iko moro ge na kognumb 3-pela pakna po megye uro nano dje yell ba, megye natoi. Iko ge kiwa makimb nuye no pora djinda paro. Ni simb to wore! dji. 8 Boiye iwa embe dji, Iwa Kerman, iko ge moyambe. Na kognumb taimane ta pandaka, iko me al makimb wallko moli gayo. 9 Are megye ta toi dal, ge wopake! Alla megye natoi dal, ni djimbena na simb tano we dji.

Ege Sabat yei kune ge, Jisas po ana ta ye wopake yei

10 Ege Sabat yei kune, Jisas lotu numb yei al po una moi al kandja dje awo moika, 11 ana ta moi ge, kum ke yene tukye al moi. Ke embe eri to paika, kognumb wan ten eit (18) er wo pi. Ana mopye buko djika, aglo du dje moya napai; magi dje wanmoi. 12 Jisas ana ge kane yau to embe dji, ni ke to pai ge ipon pora djindo we dji. 13 Dje kere une agle woro ana gakle al ambika, ana ola dje agle du dje molo, God kandjiye amblo pla wori. 14 Ba Jisas ana ye wopake ye awi ge, ege Sabat kune ye wopake ye awi. Ge pille, lotu numb iwa kerman ta moi ge kane elle kumbsika, una numog moi al embe dji, ege 6-pela una kogo yenj. Ye ke ta toi dal, ege 6-pela kiwa yero kune ge, ye wo er gun pine ba alla, ege Sabat yero kune ge, man we dji. 15 Djika Iwa Kerman Jisas embe dji, ye djillakene soka paro una mor! Ege Sabat yero kune ye porapora yenekne kog kau ne, dogi kaye piska to ipo worinjka, nu nonj ge ye kogo nayenj mo? Ge man, ye kogo yenj. 16 Ana moro ge yene gollye Abraam moi, Satan kaye to wori pa moika, kognumb wan ten eit (18) er wo pi. Ba ege Sabat yero kune ge ni ana ye wopake ye naumben we djinden ge, ni ke djinden we dji. 17 Jisas embe djika yene kunda yem una ngandjill golo moi. Jisas kogo wopake uro kaima yei ge una porapora kane wo pille awi.

Jisas iko mastet pille kandja buko dji

(Matyu 13.31-32 ne, Mak 4.30-32)

18 Embe pille Jisas embe dji, God dumoye kantau yendo ge namba mal yendo? 19 Une embe mal yendo. Iwa ta iko mastet megye ta yene mauye al ipo yaika, bolo wo kerman pi, ka wo ole al numbine take moi. 20 Jisas kandja alla dje embe dji, God dumoye kantau yendo ge namba mal yendo? 21 Yendo ge yis paro mal embe yendo. Ana ta yis i plawa merke moi al tulu dje pakna woro to kull wordaka, yake wo er kerman punda we dji.

Kond kembis yero al ge bon

(Matyu 7.13-14 ne, 7.21-23)

22 Jisas dumo kerman ne, kembis yei al porapora wane, kandja dje awo, Jerusalem puno dje yeika, 23 iwa ta wo embe dji, Iwa Kerman, God una i yem woro inda ge merke inda mo sokarita inda ne? dji. Djika Jisas embe dji, 24 Kond djillake kembis yero al ge, ye yembe ye molo er numog bon dje yene. Una merke kond djillake kembis yero al pakna bon dje yene ba, pine kune nayenda. 25 Are numb ne aglo molo kond tugdaka, ye bekleto molo numb djillake al to guno dje molo, Iwa Kerman, ni no kond yapro awe! djine ba, une embe djinda, ye na nakanill una mor, ye nam pall una wonj ne? djinda. 26 Ye embe djine, no ni boll aike kwa no wanpin alla, no dumene yei al, ni kandja dje no awin we djine. 27 Ba une kandja alla dje embe djinda, ye na nakanill una mor, ye nam pall una wonj ne? djinda. Ye singare ke ye wani una wonj ge, po er ellke pume djinda. 28 Une kandja embe dje aunda kune ge, ye God dumoye kantau yendo al kanne, iwa Abraam, Aisak ne, Jekop moyeke, propet porapora pakna moye ba une ye to orko worda, ye orkoto molo yenekne kasmane koglo, kimb kallgane yene. 29 Dumo koi koma, kona ka mor una wo God dumoye kantau yendo al kwa aike nane. 30 Ye pillme, una wekle mor una ge er wo mopne al pineke, mopne al mor una ge er wo wekle pine we dji.

Jisas Jerusalem una wandill golo awi

(Matyu 23.37-39)

31 Jisas kandja embe djika Parisi una pende wo embe dji, ni ba moren ge kere er tambye ta ben King Erot ni to goyo dje yendo we dji. 32 Djimaka, Jisas embe dji, iwa Erot moro ge une tagemage yendo una moro. Ye yem po embe dje aune, ipon ne, kumaike na po ke toi una i gun woro, una kum ke tukne al mor dje orko woro embe yeno, sale na kogo ye pora djino. 33 Iwa propet ta dumo orkoto goya ge kune nayenda, Jerusalem molo goya ge kune yendo. Ge pille, na ipon po, kumaike po, sale po pillau djino we dji. 34 Dumo Jerusalem! Jerusalem una mor ge, ye propet to golo, God dje wori woi una ku to goi. Ka kondwale me yene wombe i purbye al paknato wordo mal embe, na kune merke ye wombane aglena woro i pakna worno dje yell ba ye man dji. 35 Ye pillme! Una wo ye boll kunda ye, ye dumene to ke ye kerne. Na kandja dje ye aundo, nanam moro ge ye ipon nakanne, are God dje worda, yene unakye wondaka, ye une kane God kandjiye amblo pla woro embe djine, une wondo ge God wopake ye aundambe djine. Ye kandja embe djine kune ge, ye nanam kanne we dji.